Kryeministri Edi Rama mikpriti sot Kryeministren e Italisë Giorgia Meloni, me të cilën vizituan strukturat pritëse të migrantëve të ngritura në zonën e Shëngjinit, në Lezhë, ku po punohet sipas Protokollit të nënshkruar ndërmjet qeverisë së Republikës italiane dhe Këshillit të Ministrave të Republikës së Shqipërisë për forcimin e bashkëpunimit në fushën e migracionit, me qëllim forcimin e bashkëpunimit dypalësh ndërmjet vendeve për menaxhimin e flukseve migratore nga vendet e treta, në përputhje me të drejtën ndërkombëtare dhe atë evropiane.

Pas kësaj vizite, kryeministri Rama dhe Kryeministrja italiane Meloni dhanë një konferencë të përbashkët për shtyp:

* * *

Kryeministri Edi Rama: Mirëdita! Do të flas në italisht sepse gjithsesi këtu jemi në territor italian.

Një mirëseardhje të ngrohtë për të gjithë dhe veçanërisht për gazetarët italianë. Më lejoni të shpreh lehtësimin  dhe kënaqësinë time që t’ju shoh të gjithëve këtu shëndoshë e mirë në këtë zonë që sipas një gazete italiane e cila merret me të nesërmen, zemra, thelbi i kriminalitetit shqiptar është vendi ku veprojnë klanet të cilat lidhen me trafikun e qenieve njerëzore.

Më duhet t’ju rrëfej që e kemi marrë shumë seriozisht këtë “zbulim” shqetësues dhe meqenëse gazeta e të nesërmes thoshte edhe që Prokuroria po merret me zbulimin e këtyre klaneve, do të thotë që po merremi së bashku me Prokurorinë e posaçme për krimet e rënda dhe na siguruan që ky klan nuk ekziston as në këtë zonë dhe as në vende apo në zona të tjera të Shqipërisë, ku sigurisht, veprojnë grupe kriminaliteti, por sipas prokurorisë së posaçme, e cila është pjesë e rrjetit Eurojust, nuk ekzistojnë premisat për të folur për një mafie shqiptare, një koncept ky mjaft i përdorur kohët e fundit për të hedhur baltë mbi Shqipërinë, por duke cituar kreun e Prokurorisë së Posaçme shumë të nderuar, nuk mund të themi që në këtë vend ekzistojnë struktura, të cilat u ngjajnë organizatave mafioze të llojit Cosa Nostra, Ndragheta, Camorrra apo Sacra Corona Unita sepse grupet kriminale shqiptare nuk kanë hierarki të tyre dhe veprojnë në rrethe të ngushta familjare apo shoqërore.

Nuk mund të mos e shfrytëzoj këtë rast për të shprehur një trishtim për vetëm gjysmë të vërtetat, të cilat janë thënë në mediat italiane, përfshirë këtu shërbimin publik italian, mbi Shqipërinë, me qëllimin fare të qartë për të hedhur baltë mbi këtë vend, për të sulmuar marrëveshjen mes dy qeverive, marrëveshjen e bashkëpunimin në luftën kundër emigracionit të paligjshëm. Duhet të kenë turp, pra të turpërohen të gjithë ata që të drejtën demokratike për të kundërshtuar këtë marrëveshje, e kanë shndërruar në një abuzim të pushtetit të katërt dhe kjo në kurriz të shqiptarëve të Shqipërisë dhe të vetë publikut italian.

Falënderoj të gjithë ata që kanë treguar solidaritetin e tyre ndaj nesh.

Kam marrë mesazhe të shumta nga miq në Itali, në botën e kulturës, të sportit, kundrejt atij lumi balte të shpërthyer ndaj Shqipërisë dhe ndaj qeverisë sonë, qeveri, e cila mund të ketë mbi vete të gjitha mëkatet e botës, por kurrë nuk ka pasur mbi vete mëkatin e një dite të vetëm paqeje në luftën kundër krimit dhe as mëkatin që të kthejë kurrizin kur i është kërkuar të ndihmojë Italinë dhe jo vetëm Italinë. Do më duhet t’ju tregoj që diku, disa qindra metra prej këtu, në një hotel të madh, jeton më shpenzimet tona, tashmë prej dy vjet e gjysmë një komunitet afganësh.

Janë gati 350 njerëz që i janë larguar vdekjes pas rënies së Kabulit dhe që janë mikpritur dhe pranuar nga Shqipëria me mijëra njerëz, të cilët asnjë prej vendeve anëtare të NATO-s nuk pranoi t’i pranonte. Një pjesë e mirë e tyre janë strehuar në SHBA dhe në Kanada ndërkohë që çdo të premte mbërrin një avion me 90 apo deri në 120 persona, të cilët qëndrojnë këtu për në periudhë 3 deri në 6 muaj për t’u transferuar më pas. Ata të cilët nuk arrijnë t’i  kalojnë filtrat mbeten të strehuar prej nesh dhe as nuk do t’i largojmë, as do të kërkojmë para për ta nga NATO që i bëri ata të ëndërronin demokracinë dhe jetën e bukur me gjithë të mirat në Afganistan dhe as nga Bashkimi Europian edhe pse më duhet t’ju rrëfej që këto para , nuk janë shuma dhe aq të vogla për arkën tonë. Por si të shpjegojmë faktin që disa gazetarë investigativë apo të kërkimit, vijnë këtu dhe nuk i shohin ata? Pra nuk shohin këta qindra emigrantë që i janë vjedhur vdekjes, por shohin fantazma, shohin shpirtra të kriminalitetit që ekzistojnë vetëm në mendjet e tyre kur paguajnë biletën për të mbërritur në Shqipëri, për të informuar publikun e tyre me lajme të shkruara tashmë më parë. Ok, është ajo që është, siç do të thoshte ish banori i Shtëpisë së Bardhë. Çdonjëri prej nesh bën atë që mendon se është e dobishme.

Mua, më duhet të them që jam krenar për  Shqipërinë që mund t’i shërbejë Italisë.

Italia ka qenë e dobishme dhe i ka shërbyer Shqipërisë shumë, shumë herë dhe nëse ne kemi mundësinë për të qenë të dobishëm për Italinë, pra për t’i shërbyer asaj një herë, dy, tre, atëherë le ta shfrytëzojmë këtë mundësi dhe ta bëjmë këtë me zemër dhe me bindjen që deti mes Italisë dhe Shqipërisë nuk është një hapësirë e cila na ndan, është një hapësirë që na bashkon dhe kjo prej mijëra vitesh.

E në një çast kaq të vështirë, jo vetëm për Italinë, por për gjithë Evropën, ne jemi shumë krenarë që mund të japim ndihmën tonë jo si europianë të bashkuar brenda BE-së, por si evropianë me BE-në, sepse në fund të fundit askush nuk vendos nëse ne jemi evropianë apo jo, askush nuk ka vendosur ta vendoste Shqipërinë dhe shqiptarët në zemër të Europës, pastaj sigurisht mund të diskutojmë për çdo gjë dhe mund të kemi dyshime për çdo gjë, qoftë edhe mbi mirësinë që kjo marrëveshje ka, nëse do të jetë diçka me vlerë apo do të jetë një gabim nuk e di, por sidoqoftë, nëse do të jetë një gabim do të jetë një gabim i bërë me zemër e jo me llogaritjet e egra.

Ndërkohë që, në vend që të flasim e të flasim, ne u përpoqëm që të bëjmë pa pasur pretendimin që ta zgjidhim këtë problem kaq të madh të migracionit në Europë, por nga ana tjetër, pa ndenjur në vend thjesht, duke biseduar e folur për këtë – siç bënin dikur priftërinjtë e Kostandinopojës që flisnin për seksin e engjëjve, ndërkohë që muret e qytetit ishin bërë gjithë vrima nga goditjet, – por duke u përpjekur që të ndërtojmë dhe të shtojmë diçka konstruktive.

Thënë kjo, shpresoj që të mund të kuptohet trazimi që kam në shpirtin tim për faktin që kam jetuar si kryeministër i këtij vendi të gjithë këtë spektakël gjysmë të vërtetash, që janë gënjeshtra, falsitete të mëdha dhe çaste të një balte të pamerituar ndaj shqiptarëve dhe ndaj Shqipërisë.

Nga ana tjetër, duhet të falënderoj Giorgian, kryeministren e një vendi me të cilin jemi të lidhur në mënyrë të pandashme, të pashlyeshme për të gjithë afeksionin dhe gjithë vullnetin e mirë që ka treguar teksa e ka shoqëruar Shqipërinë në rrugëtimin e saj të plotë drejt Bashkimit Europian.

Italia ka qenë gjithmonë avokati ynë më i rëndësishëm në Bruksel dhe të kesh sot këtu nderin të jemi të dobishëm është diçka që ne e shohim si një bekim.

Nga ana tjetër, më duhet të them që për ne këtu në Shqipëri nuk ka të bëjë ngjyra e forcave politike të cilat qeverisin Italinë. E ka qeverisur Italinë e majta, qendra e majtë, e djathta, qendra e djathtë, janë këmbyer pozicionet e tyre në bazë të vullnetit që populli italian ka pasur, por me të gjithë kemi pasur një marrëdhënie vëllazërie dhe të gjithë kanë bërë më të mirën e tyre për të na ndihmuar.

Kjo duhet kuptuar mirë edhe nga shokët e mi të dashur të së majtës italiane sepse kur ata shprehin konsiderata për mënyrën se si vepron qeveria shqiptare kundrejt Italisë, duhet edhe të kuptojnë që tesera e anëtarësimit në një parti dhe në një fushë politike veprimi, në një fushë politike, nuk kanë të bëjë. Për ne, qeveria italiane ka qenë, është dhe do të jetë gjithmonë qeveria e një vendi me të cilin na lidh një miqësi shumë e veçantë dhe një aleancë strategjike që ne duam ta zhvillojmë dhe ta fuqizojmë hap pas hapi.

Nëse gabon qeveria italiane, ne marrim pjesë në atë gabim pa asnjë ngurrim, por le të mos e kthejmë këtë në një çështje politike të përditshme dhe në një çështje gabimesh që janë një tjetër arsye për t’u ndjerë si në shtëpi kur ndjekim politikën italiane sepse jemi shumë të ngjashëm, një ngjashmëri e cila ndonjëherë të bën të mendosh “Po pse nuk i bashkojmë dy vendet tona në një dhe kështu të bashkojmë edhe partitë politike, edhe gazetarët dhe le të bëjmë një festë të madhe gjysmë të vërtetash dhe pune të përbashkët”?

Faleminderit dhe tani fjala për kryeministren.

  

Kryeministrja e Italisë, Giorgia Meloni: Faleminderit zoti kryeministër! Mirëdita të gjithëve!

Do doja të thoja që jam me të vërtetë lumtur që jam këtu, që pata rastin që t’ju takoj juve, që kryeministri Rama pati mundësinë gjithashtu të verifikonte nga afër edhe situatën e punimeve që janë duke u realizuar në kuadër të marrëveshjes së nënshkruara mes dy qeverive tona në fushën e migracionit.

Do doja gjithashtu të thoja, ashtu sikundër ne pamë dhe dëgjuam nga fjalët e kryeministrit Rama, se vendet tona janë dy vende mike, janë vende që historikisht kanë bashkëpunuar së bashku dhe do doja të falënderoja dhe një herë kryeministrin Rama, të gjithë popullin shqiptar për mundësinë që na dhanë, për ndihmën që na dhanë në mënyrë që ne të realizonim këtë marrëveshje dhe që unë shpresoj që të jetë një shembull për të gjithë BE.

Duke ndjekur edhe fjalët e kryeministrit Rama, nuk më mbetet tjetër veçse të përsëris edhe një herë të gjithë afërsinë e qeverisë italiane, të popullit italian për sulmet që i janë bërë kryeministrit Rama dhe qeverisë së tij dhe që faktikisht qeveria shqiptare s’ka bërë gjë tjetër veçse e ka ndihmuar qeverinë italiane.

Ne faktikisht kemi ndjekur dhe një fushatë denigruese ndaj qeverisë shqiptare dhe në një farë mënyrë kemi dëgjuar edhe etiketime sikur qeveria shqiptare është një narko-shtet sepse nuk është hera e parë që kryeministri Rama dhe Shqipëria, sikundër e përmendi vetë kryeministri, i ofrojnë bashkëpunimin Italisë sepse edhe më parë historia e Shqipërisë ka treguar se ajo ka patur me të vërtetë dëshirën e sinqertë për të qenë pjesë e Bashkimit Europian dhe për të gjetur, për të zgjedhur të gjitha ato mundësi bashkëpunimi dhe nuk i ka munguar asnjëherë mbështetja e Italisë për këtë.

Më kujtohet kur në ditët më dramatike të emergjencës Covid qeveria shqiptare me kurajë dhe me bujari ofroi, ndihmoi me 30 mjekë dhe infermierë në Lombardi, që ishte kryeqendra e emergjencës Covid, sikundër dhe në rastet e tjera kryeministri Rama u falënderua për këtë dhe një nga gazetarët dhe gazeta italiane e quajti, e titulloi “përrallë e bukur e qeverisë shqiptare dhe e kryeministrit shqiptar”, ndërsa sot Kryeministri Rama quhet “spregiudicato”sepse shumë kanë ndryshuar kur qeveria vendosi të vijojë bashkëpunimin me qeverinë e re italiane, sikundër kishte bërë dhe me 5 qeveritë e tjera, ndërkohë përgjatë gjithë kësaj kohe.

Do doja t’i thoja kryeministrit Rama sepse në fakt nuk është ai shënjestra sepse italianët e kuptojnë, janë mirënjohës qeverisë, i janë mirënjohës popullit shqiptar për këtë përpjekje të rëndësishme që përbën një shenjë të miqësisë mes dy popujve tanë për të na dhënë një ndihmesë.

Kur verën e kaluar unë erdha këtu në Shqipëri dhe pata rastin të diskutoj me Kryeministrin Rama për këtë marrëveshje, ne morëm parasysh disa kritere, disa kushte sepse emigracioni i jashtëligjshëm është një fenomen shqetësues dhe që vendet e Bashkimit Europian nuk mund ta përballojnë të vetme, por duhet edhe ndihma e vendeve të tjera ta BE-së, por dhe vendeve jashtë BE dhe që nuk na mbetet tjetër veçse ne ta forcojmë këtë bashkëpunim dhe ne arritëm në realizimin dhe në nënshkrimin e kësaj marrëveshjeje që bazohet në tre objektiva: në luftën ndaj trafikut të qenieve njerëzore, gjithashtu edhe të emigracionit të paligjshëm dhe nëpërmjet kësaj marrëveshjeje sigurisht që Shqipëria ka vënë në dispozicion edhe disa territore të saj, pra zona e Shëngjinit ku ndodhemi sot edhe ajo e Gjadrit, në të cilat Italia po realizon, po kryen punimet për ngritjen e dy qendrave, të cilat fillimisht në Shëngjin do të mirëpresim emigrantët dhe qendra e Gjadrit në të cilën do strehohen. Është një marrëveshje novative dhe kur e kemi nënshkruar besoj e mbani mend që unë mendova dhe dëshirova fort që të shndërrohej si një model për vendet e tjera dhe ju shikoni dhe vetë që edhe disa javë përpara, 15 vendeve të BE nga 27, pra pjesa më e madhe e tyre nënshkruan dhe i dërguan një apel Komisionit Europian për të kërkuar në mënyrë që këto vende, vendet e Bashkimit të ndjekin shembullin e marrëveshjes mes Italisë dhe Shqipërisë.

Ndërkohë edhe vet qeveria gjermane dhe ministri i Brendshëm gjerman, këshilluan pikërisht ndjekjen e modelit të marrëveshjes mes Italisë dhe Shqipërisë. Dhe ne ndodhemi këtu pas kaq muajsh për të lançuar edhe realizimin e punimeve në strukturën e Shëngjinit dhe kjo strukturë do të kryejë pikërisht funksionin e mikpritjes së mbërritjes së emigrantëve dhe ju e dini shumë mirë numrin e madh të klandestinëve që kanë mbërritur në brigjet e Italisë dhe të gjitha ato procedua që do të ndiqen, që nga momenti i identifikimit, i marrjes së gjurmëve te gishtave, i fotografisë e të gjitha e pastaj do transferohen në qendrën e Gjadrit.

Sigurisht që emigrantët që janë shpëtuar nga anijet italiane, por sigurisht që në Shqipëri nuk do të vijnë ata emigrantë, nga të cilët, gra shtatzëna, fëmijë, persona në moshë të caktuar. Do të jetë një strukturë ku do të kryhen të gjitha procedurat e kalimit të kufirit dhe që kërkojnë maksimumi 28 ditë dhe që do të trajtojë gjithashtu edhe kërkesat për azil. Gjithashtu, do të kemi dhe përshpejtim të procedurave në rastin kur emigrantët vijnë, pra kanë origjinën nga vendet e ashtuquajtura të sigurta si Bangladesh, Kamerun, Egjipt dhe Sri Lanka dhe do të zgjerojmë pra kështu numrin apo prejardhjen, origjinën e emigrantëve, të cilët do të mbërrijnë në Shqipëri.

Gjithashtu do të forcojmë dhe të gjitha procedurat, të cilat do të jenë të detyrueshme edhe për gjithë Bashkimin Europian dhe Bashkimi Europian në hartimin e bilancit të saj do të parashikojë shpenzimet apo fondet që nevojiten për realizimin e të gjitha këtyre procedurave që përmenda pak më lartë.

Ndërsa struktura e Gjadrit do të ketë gjithashtu edhe një funksion tjetër. Aty ku do të ndalen edhe emigrantët që do të mbërrijnë në Shqipëri dhe do të ketë gjithashtu një zonë, një hapësirë ku do të mbahen të ashtuquajturit emigrantë, si të themi të burgosur në rast se do të kryejnë vepra penale. Sigurisht që rendi publik brenda perimetrit të qendrave do të garantohen nga autoritetet italiane dhe të dy qendrat do të jenë operative nga 1 gushti 2024.

Ka patur nga ata që kanë ngritur kundërshti apo problematika për sa i përket kohës së realizimit të këtyre qendrave dhe mjaft parlamentarë të opozitës italiane gjithashtu e kanë ngritur sepse faktikisht para së gjithash na kanë akuzuar se po ngrinim një qendër e njëjtë si Guantanamo,  por nga ana tjetër pastaj ankoheshin se punimet për realizimin e këtyre qendrave po vonoheshin, se ishin me vonese. Duam t’i bëjmë gjërat ashtu siç duhet sepse këtu kemi menduar që gjerat do të funksionojnë dhe jam e bindur që do të funksionojnë dhe kemi përuruar një fazë krejtësisht të re në menaxhimin e fluksit emigrantor.

Kjo marrëveshje mund të diskutohet shumë edhe nga vende të tjera. Mund të bëhet si një pjesë e zgjidhjes së Bashkimit Europian, këtë e kuptojmë ne dhe e kuptojnë sigurisht edhe mbështetësit e emigracionit të pakontrolluar apo të paligjshëm dhe që faktikisht e kanë kundërshtuar fuqishëm këtë marrëveshje. Pra ne duam të lëmë gjithçka pas krahëve dhe t’iu themi që do ta realizojmë me sukses.

Sigurisht që dy muajt e vonesës të parashikuar për realizimin e punimeve janë shkaktuar edhe përsa i përket terrenit disi të vështirë në Gjadër, por gjithashtu nga ana tjetër marrëveshja dhe këto qendra do të shërbejnë edhe si një zgjidhje për problematikën që haset prej viti 1991, por pastaj ne do të trajtojmë edhe pjesën tjetër te marrëveshjet e mundshme mes Italisë dhe Afrikës Veriore.

Nga vende të ashtuquajtura të quajtura të sigurta kanë mbërritur në Itali rreth 11 mijë persona dhe këto 11 mijë persona gjysma prej tyre janë subjekte vulnerabël. Faktikisht ne duhet të kishim dërguar në Shqipëri 5500 dhe në këtë mënyrë qendra pastaj do të kishte vijuar me gjithë trajtimin e tyre.

Gjithashtu MediHospes do të jetë shoqëria, e cila do të ndjekë të gjithë procedurën e menaxhimit të strukturave, transporti do të kryhet nga anije e marinës italiane, Guardia Di Finanza, e kështu me radhë dhe që Ministria e Brendshme gjithashtu ka shpallur edhe një garë për sa i përket shpenzimeve të transportit që arrijnë shifrën 13.5 milion euro, por sigurisht edhe për sa i përket situatës në Detin e Kuq apo në Detin Mesdhe do të shohim mundësinë e trajtimit të këtyre emigrantëve nga anijet e marinës Italiane.

Pra, kemi gjithashtu 334 milion euro në vit, që përbëjnë 7.5% të trajtimit të emigrantëve në territor kombëtar dhe ne jemi të bindur se këto burime nuk duhet të konsiderohen si burime shtese, sepse emigrantët që do të vijnë në Shqipëri gjithsesi do të priteshin në Itali, ku sigurisht  që kanë kosto, e dyta ne mendojmë se elementi kryesor i dobishëm i kësaj marrëveshje është se mund të jetë një mjet i fuqishëm për të penguar emigrantët që të mbërrijnë në brigjet tona, pra në brigjet e Europës dhe gjithashtu mund të jetë edhe instrument për të kundërshtuar dhe për të luftuar edhe trafikun e qenieve njerëzore nga organizatat kriminale, çka përkthehet gjithashtu edhe në një reduktim të kostove apo të shpenzimeve.

Pra, faktikisht këtë vit kemi arritur edhe një ulje prej 60% të emigrantëve të paligjshëm që kanë mbërritur në brigjet italiane dhe si për rrjedhojë edhe kostot janë ulur, shpenzimet janë ulur. Pra ne nuk është se po bëjmë kosto, ne po bëjmë një investim.

Krahas kësaj duke bërë një përllogaritje të shpejtë, me kapacitetin e këtyre qendrave duke patur parasysh faktin e atyre emigrantëve, pra që nuk priten në Itali, atëherë në Itali do të kursejmë rreth 136 milion euro.

Ne jemi mjaft të kënaqur edhe në përfundim të punimeve dhe të rezultateve që kemi bërë deri këtu. Do doja të falënderoja të gjithë ata që e bënë të mundur të gjithë këtë. Sigurisht së pari kryeministrin Rama dhe ministrat e tij, ministrat e qeverisë së tij.

Do doja të falënderoja ministrat e mi, ministrin Piantedosi, ministrin Tajani, ministrin Crosetto.

Do doja të falënderoja  edhe Forcat e Genios apo të gjithë administratën shtetërore, do doja të falënderoja ambasadorin Bucci, Ambasadori ynë në Tiranë, i cili ka ndjekur hap pas hapi të gjithë procedurat.

Pra, një falënderim i ndjerë për të gjitha forcat e rendit dhe të gjithë ata që kanë vënë zemrën dhe mendjen e tyre në funksion të realizimit të kësaj nismative e nëpërmjet kësaj marrëveshje, jo vetëm që fuqizohet më tepër marrëdhënia jonë, por do doja këtu të theksoja që shkëmbimi ynë tregtar, pra shkëmbimi me Italinë zë vendin e parë dhe përbën 20% të prodhimit të brendshëm bruto shqiptar.

Gjithashtu, Shqipëria është një vend mik i Italisë dhe Bashkimit Europian sepse Shqipëria, sillet tashmë sikur të ishte pjesë, anëtare me të drejta të plota të Bashkimit Europian edhe pse faktikisht nuk është dhe që faktikisht i përmbahet të gjitha parimeve që janë në themel të Bashkimit Europian.

Italia do të jetë dhe është gjithmonë një mbështetëse e fuqishme e anëtarësimit, jo vetëm e Shqipërisë, por edhe Ballkanit Perëndimor në Bashkimin Europian dhe së bashku me kryeministrin Rama kemi qenë protagonistë të realizimit dhe të arritjes së kësaj marrëveshje.

* * *

– E nderuar zonja kryeministre, do doja të dija nga ju se cili është burimi i gjithë kësaj balte hedhur ndaj Shqipërisë dhe kryeministrit Edi Rama që në momentin kur ju së bashku në Romë, nënshkruat këtë marrëveshje. Është një sulm i orkestruar nga opozita e vendit tuaj kundërshtuese e kësaj marrëveshje, apo kemi të bëjmë thjesht me një tekë gazetareske siç ishte ajo e emisionit Report në Rai 3?

-I nderuar kryeministër Rama, cili do të jetë përfitimi i ekonomisë lokale me ndërtimin e kësaj qendre pritje dhe me qendrën tjetër të akomodimit në Gjadër, pasi emigrantët natyrisht do të ushqehen, kanë nevojë për kujdes e të tjera.

Kryeministrja e Italisë Giorgia Meloni: E thashë dhe gjatë fjalës time, unë mendoj se arsyeja e vërtetë nuk është sigurisht që të sulmohet qeveria shqiptare, populli shqiptar, besoj se janë le të themi pozicione apo qëndrime të ligjshme, apo të legjitimuara, të ndryshme dhe që janë armiqësore ndaj qeverisë italiane dhe që luajnë si të thuash edhe në këndvështrimin e tyre, duke shpalosur gjithë qëndrimin e tyre. Sigurisht që unë mendoj që duhet vlerësuar fakti që për të goditur, për të sulmuar qeverinë italiane, goditet apo sulmohet edhe një partner ndërkombëtar, sepse këtu nuk po dëmtohet thjesht qeveria italiane, por edhe Italia si vend, sepse pavarësisht suksesit ose jo të marrëveshjes, e gjitha kjo përfshihet apo është pjesë e të gjithë përbaltjes që i bëhet qeverisë italiane dhe këtu rrezikojmë që t’i shkaktojmë një dëm të gjithë vendit.

Sigurisht që është e ligjshme apo në një farë mënyre, por gjithsesi edhe pse bëhet fjalë, pra shtypi italian ka bërë një zgjedhje të saj, unë shpreh të gjithë gatishmërinë dhe solidaritetin tim që ta hedhim poshtë të gjithë këtë përbaltje dhe premtoj që në të ardhmen do të jemi  më të vëmendshëm ndaj të gjitha propozimeve apo marrëveshjeve që ne realizojmë, sepse ne sigurisht që s’mund të rrezikojmë, nuk mund të vëmë në rrezik apo të komprometojmë marrëdhëniet e fqinjësisë apo marrëdhëniet me vendet e tjera. Këtë unë e kam bërë  kur kam qenë në opozitë, por nuk e shoh tashmë që ta bëjnë të tjerët.

Kryeministri Edi Rama: Unë e kam përsëritur vazhdimisht që ky proces i përfshirjes së Shqipërisë në komunitetin e vendeve demokratike, i anëtarësimit të saj në NATO apo i anëtarësimit të saj në Bashkimin Europian, si dhe fakti që Shqipëria më në fund, pas qindra vjetësh, nën perandori dhe nën regjime të imponuara, ka zgjedhur të jetë pjesë e këtij komuniteti, dhe për këtë ka aleatë strategjik Bashkimin Europian dhe Shtetet e Bashkuara të Amerikës, ashtu siç ka të gjitha të mirat, ka edhe pjesën që është sfiduese, pra raportet në këtë komunitet, nuk janë një menu që kur ti do të marrësh mbështetje, kur ti do të jesh i ndihmuar, kur ti do të kesh më shumë mundësi për të investuar në një rrugë të daljes përfundimtare nga tuneli i së shkuarës dhe të ngjitjes në majën ku shqiptarët aspirojnë, dhe nga ana tjetër, pasi këto i ke marrë të gjitha, kur vjen puna te sfidat, kur vjen puna tek edhe ato momente që nuk janë patjetër momente lumturie, po janë momente pagjumësie, të thuash jo. Ne mund të thoshim jo, siç thanë të gjithë të tjerët, kur ata në Kabul u lanë në mëshirën e fatit, por duke qenë një vend që jemi në NATO, ama jemi të vetëdijshëm që nuk jemi një fuqi ushtarake që mund të kontribuojmë për të përcaktuar fatet e luftërave ku futet NATO, na takonte ne, edhe për traditën tonë, mos e harroni asnjëherë, jemi i vetmi vend në Europë, që kemi pasur më shumë hebrenj pas Luftës së Dytë Botërore, sesa para Luftës së Parë Botërore, pikërisht sepse ne jemi lindur në një vend që në ADN-në e vet, e ka të shkruar që shtëpia e shqiptarit, është e Zotit dhe e mikut dhe kur dera troket, ti duhet ta hapësh dhe prandaj ne bëmë atë gjest, që nuk ishte një gjest i kalkuluar për ndonjë interes, as duke menduar se çfarë do fitojmë ne në pikëpamjen ekonomike, sepse praktikisht e thashë dhe më parë ne po paguajmë për qëndrimin e disa qindra afganëve në hotel këtu afër me shpenzimet tona dhe kam dëgjuar lloj-lloj gjërash që as nuk mund t’i imagjinoja, dhe kam lexuar lloj-lloj gjërash që as nuk mund t’i imagjinoja në mediat italiane se çfarë fshihet mbas kësaj marrëveshje, ndërkohë që ne nuk kemi kërkuar asnjë euro, sepse në momentin që do të kërkonim 1 euro, ne nuk do të ishim ne dhe Shqipëria nuk do të ishte ajo që është dhe që duhet të jetë, një mik dhe një aleat që është aty, pronto, në momentin kur një mik i madh dhe një aleat i madh si Italia thotë: A mund të na jepni një dorë?

Çfarë do fitojë ekonomia lokale këtu nga kjo marrëveshje dhe nga fakti që siç thatë ju, këta njerëz do ushqehem, do shërbehen e të tjerë dhe natyrisht janë burimet ekonomike të zonës që do të ndihmojnë në këtë, ne nuk e kemi bërë këtë kalkulim. Ne nuk e kemi bërë këtë kalkulim, kjo është e vërteta dhe është e tmerrshme të shohësh se si kjo marrëveshje është komentuar deri dhe tek dhënia e tenderave për ndërtimin e qendrës, Malavitës shqiptare, ndërkohë që gjithçka administrohet nga pala italiane. Gjithçka! Ne kemi dhënë disponibilitetin e shtëpisë tonë për një hall që Italia na tha na ndihmoni që ta adresojmë bashkërisht. Çfarë kalkulimesh ka bërë Italia 30 vjet, qeveritë italiane çfarë kalkulimesh kanë bërë kur kanë nisur këtu misione të tëra, mijëra ushtarë? Çfarë kalkulimesh bëri qeveria italiane kur nisi këtu repartin më të madh të zjarrfikësve që vinin për herë të parë në Shqipëri  kur ra tërmeti? Erdhën të parët dhe futeshin nën ato rrënoja për të shpëtuar jetë njerëzish duke rrezikuar jetën e tyre? I kam parë vetë, mund të kishin lënë jetën atje.

Çfarë kalkulimesh bëri qeveria italiane? As nuk tha “Shiko se kjo kushton kaq”, as nuk mendoi që “Shiko ne po ju bëjmë këtë, por ju duhet të na bëni këtë” por i bëri sepse kështu funksionon kjo marrëdhënie dhe kështu funksionon ky raport special që ne kemi me Italinë.

E fundit që kam, këtë jua kam thënë partnerëve të tjerë, kur kanë ardhur dhe më kanë thënë “E bëtë me Italinë, bëjeni dhe me ne” dhe ju kamë thënë “Jo”. Ne këtë mundësi kemi dhe këtë mundësi që ne kemi mund ta shfrytëzojë vetëm Italia, asnjë vend tjetër”,  për njëmijë e një arsye historike të së sotmes dhe të së nesërmes.

Nuk ka këtu kalkulime të asnjë natyre.

Pastaj, funksionon a nuk funksionon, do të ketë probleme, si do zgjidhen problemet, këto janë të gjitha gjëra që do t’i provojë koha, por ama kjo është një marrëveshje zemre dhe një marrëveshje përgjegjësie, në raport me një miqësi strategjike dhe në raport me një komunitet siç është komuniteti i vendeve të Europës që është sot në një situatë ku ka shumë pikëpyetje për mënyrën sesi të adresojë këtë fenomen. Kaq.

 

-Do doja të pyesja kryeministren Meloni se përse nuk i ka kushtuar fondet për realizimin e kësaj marrëveshjeje për sektorin e shëndetësisë?

Kryeministrja e Italisë, Giorgia Meloni: I jam  përgjigjur kësaj pyetjeje. Sigurisht që burimet që do të përdoren në Shqipëri për menaxhimin e fluksit migrator të emigracionit sepse këtu përpiqemi që ta zgjidhim këtë problem ndërsa përdorimi i këtyre fondeve në sektorin e shëndetësisë është diçka që nuk mund ta zgjidhë këtë problematikë dhe gjithashtu, burimet që më janë kërkuar janë përdorur pikërisht për të zgjidhur diçka që ma kanë kërkuar edhe qytetarët italianë, pra janë burime të shpenzuara për të zgjidhur një problem dhe do të doni të dini se cilat janë shpenzimet që mund të përdoreshin për shëndetësinë? 17miliardë euro në mashtrimet e superbonus. Pra, para që ishin të destinuara për të sëmurët, por që kanë përfunduar në xhepat e mashtruesve.

Pra, në qoftë se unë do të kisha ato 17miliardë euro, nuk po them ato 200 miliardët për bonusin në sektorin e ndërtimit por thjesht 17 miliardë eurot e mashtrimit. Sigurisht që unë këto burime financiare do t’i kisha përdorur për sektorin e shëndetësisë dhe këtu është e gjitha.

 

-Zoti Rama, atyre refugjatëve të cilët do t’ju refuzohet azili dhe nëse këta refugjatë do të kërkojnë azil në Shqipëri, si do të procedohet?

Kryeministri Edi Rama: Atëherë, edhe njëherë. Kjo është një marrëveshje dhe dua ta theksoj dhe këtë sepse në këtë pikë ka pasur shumë konfuzion, e cila, jo vetëm nuk ka ndeshur në refuzim apo në kontestim të Bashkimit Europian ose të ndonjë vendi të Bashkimit Europian, por përkundrazi, është konsideruar si një përpjekje për t’u ndjekur në vijim dhe si një proces për t’u vlerësuar hap pas hapi. Praktikisht, e tha kryeministra, Kkancelari i Gjermanisë, i cili është lideri i partisë Social Demokrate gjermane, pra, i të majtës europiane është shprehur se kjo marrëveshje ka interes të veçantë për vetë Gjermaninë.

E dyta, e thashë dhe po e përsëris, ne nuk jemi një vend i Bashkimit Europian, por ne jemi një europian dhe nuk është vepra jonë harta aktuale e Bashkimit Europian.

Bashkimi Europian është realiteti i parë gjeopolitik në historinë e hartave, që kur bota ka filluar të vizatojë harta, që ka dy kufij; një kufi të jashtëm dhe një kufi të brendshëm, pra një perimetër të jashtëm dhe një kufi të brendshëm dhe në mes të Bashkimit Europian është një zonë që quhet Ballkani Perëndimor. Për të hyrë në Shqipëri do hysh nga Bashkimi Europian se nuk ke nga hyn tjetër dhe për të dalë nga Shqipëria do dalësh nga Bashkimi Europian se nuk ke nga del tjetër dhe fakti që ne po sillemi siç normalisht duhet të silleshin dhe duhet të sillen të gjithë vendet e Bashkimit Europian që kanë një legjislacion të veçantë për rishpërndarjen sepse kur një emigrant shkel në Lampeduza nuk shkel vetëm në Itali, por shkel në të gjithë Bashkimin Europian. Pra, është një i ardhur në Bashkimin Europian, nuk është një i ardhur në Itali dhe rishpërndarja do të thotë që të gjitha vendet marrin barrën e tyre për të administruar këtë fluks njerëzish, të cilët kërkojnë të qëndrojnë dhe të ndërtojnë një jetë në Bashkimin Europian.

Kjo nuk ka funksionuar.

Ndërkohë që, kjo qendra këtu bën zhurmë të madhe vetëm për faktin që ne nuk jemi në Bashkimin Europian sepse po të ishte ndërtuar e njëjta qendër si këtu, në çdo vend të Bashkimit Europian, konsiderohet normal. Këtu konsiderohet Guantanamo ose Lager. Po pse? Për cilën arsye?

E fundit, e thashë më parë me rastin e afganëve. Ne i morëm disa mijëra afganë menjëherë kur vendet e NATO-s, vende shumë të pasura i refuzuan, si Britania e Madhe. Ne morëm disa mijëra menjëherë, Britania e Madhe tha “Do marr 15 mijë në 15 vitet e ardhshme” se ndërkohë ndërrojnë 6 qeveri në 4 vjet dhe nuk e kanë problem që të thonë “t’ia shtyjmë se i marrin të tjerët”.

Kur i morëm, ishim të vetëdijshëm që jo të gjithë do e kalonin procesin e aplikimit dhe jo të gjithë do të konsideroheshin si të pranueshëm, nga pikëpamja legale, në Shtetet e Bashkuara  apo në Kanada. Pra, morëm përsipër një risk që mund të na i linin dhe të gjithë këtu. Nuk do të ishte ndonjë çudi që Shtetet e Bashkuara ta harronin këtë zotim sepse duke qenë shumë të mëdhenj kanë luksin që t’i harrojnë dhe premtimet se nuk i kërkojmë dot ne llogari. Gjëra që kanë ndodhur dhe nuk e kam, si të thuash, kritikë, por e kam konstatim.

Por ja që një pjesë e madhe e tyre lëvizën, thashë që ditëve të premte thuajse në mënyrë të përjavshme këtu vijnë avionë, përpunohen dhe ikin, kemi rreth 350 që nuk pranohen atje, janë këtu.

Keni dëgjuar ju që të vëmë kujën apo të shkojmë t’i themi “Hajdeni merreni se do t’i hedhim në det”?

Jo, i mbajmë në hotel dhe i paguajmë ne, siç na kanë mbajtur dhe na kanë paguar ne të tjerët, kur kishim ne nevojë, kur ishim ne “afganët” që iknim nga “ferri” këtu i diktaturës komuniste dhe përplaseshim në dyert e italianëve.

Kështu është jeta, ka një kohë për të marrë, ka edhe një kohë për të dhënë. Fatmirësisht ne kemi pasur në radhë të parë Italinë që ka pasur mundësinë të na japë shumë. Ne nuk jemi Italia, jemi Shqipëria, por kemi mundësi të japim pak dhe këtë po bëjmë, kështu që nuk ka asnjë shqetësim në këndvështrimin tim sepse dhe e mbylla, ka dhe një pikë tjetër marrëveshja; nuk është një marrëveshje “spregiudicata”, siç thonë.

Edhe sepse mendoj që më mirë të jesh “spregiudicato”  kur do që të bësh diçka të mirë sesa të jesh “pregiudicato” kur bën gjëra të këqija.

Kështu që janë 3 mijë vende fikse, pra janë 3 mijë vende fikse, është e mbyllur me 3 mijë, që mund të akomodohen në Gjadër dhe aty do të trajtohen sipas të gjitha ligjeve dhe rregullave të Italisë demokratike, se nuk më rezulton që Italia ka probleme me të drejtat e njeriut pastaj ata që do të konsiderohen nga Italia si të pranueshëm për kërkesat për azil, do të shkojnë në Itali dhe vetëm ato vende që do të lirohen prej atyre që do të shkojnë në Itali, do të mund të rimbushen.

Pra, në të gjitha rastet edhe sikur të themi, Italia e mbyll me kaq, ne nuk mund të bëjmë asnjë zhurmë dhe nuk mund të bëjmë asnjë naze për 3 mijë njerëz, njerëz në hall, njerëz që ikin nga varfëria dhe që janë viktima të trafikantëve që u marrin edhe lekun e fundit dhe i sjellin lakuriq në brigjet e Europës.

Gjyshërit tanë kanë mbrojtur hebrenjtë, s’kanë dorëzuar asnjë hebre tek nazistët, asnjë!

Ashtu siç kanë marrë në mbrojtje mijëra ushtarë italianë që i kërkonin nazistet dhe i morën, i fshehën, i ushqyen dhe i mbajtën deri sa i përcollën në Itali, duke rrezikuar jetën e tyre. Këtu askush s’po rrezikon jetën, përkundrazi, jeta juaj që po ndiqni këto ngjarje bëhet më interesante se keni dhe lajme, keni dhe situata që mund t’i përshkruani me ngjyra tërheqëse, mund të rrisni audiencën, mund të rrisni ato “like”-t dhe “dislike”-t nëpër ato rrjete sociale kështu që mos u shqetësoni. Nuk do ndodhë asgjë siç nuk ndodhi kur erdhën mijëra afganë dhe që të gjithë thoshin “do i ndodhë gjëma”. Ndërkohë që e patë shumë mirë që populli shqiptar i mirëpriti se ky është populli shqiptar. Disa pastaj që bëjnë atë që bëjnë sepse i thonë vetes opozitë, janë punë e tyre sepse janë pa punë.

– Do të doja t’i rikthehesha çështjes së kohës sa i përket realizimit të punimeve.  Një pyetje për Kryeministren Meloni përsa i përket kohës së realizimit punimeve në këtë qendër dhe pra, nuk mund të jetë funksionale nëqoftëse nuk përfundojnë punimet në qendrën e Gjadrit sepse faktikisht janë të ndërlidhura me njëra-tjetrën. Një rrethanë e tillë e bën që opozita të flasë edhe në vigjilje të zgjedhjeve europiane, të flasë për rolin e saj në krye të qeverisë, pra si kreu i listës së kandidatëve më të rëndësishëm Italinë, pra punimet që do të kryhen në Gjadër, do të përfundojnë brenda datës 31 korrik dhe do të jetë operative prej datës 1 gusht dhe sa emigrantë do të priten në këto qendra sepse kontratat me anijet janë që prej datës 15 shtator?

 Kryeministrja e Italisë, Giorgia Meloni:  Përsa i përket opozitës ajo bën punën e saj dhe e konsideroj si diçka normale dhe sido që të bësh gabon, nëqoftëse nuk do ta bëja këtë, do më thoshin “bën fushatë elektorale”. Duke e bërë këtë thonë gjithnjë pra se po bëj fushatë elektorale, por unë gjithsesi po bëj punën time sepse unë ndjek çdo gjë që duhet bërë dhe kuptoj opozitën sepse ju nuk mund të kërkoni qe unë të zhdukem, pra të mos bëj asgjë, sepse nuk po bëj fushatë zgjedhore në këtë muaj. Të vetmin eveniment e kam bërë javën e kaluar. Pra shkoj në Shqipëri, më thonë po bën fushatë zgjedhore; një spot televiziv, është fushatë zgjedhore, pra atëherë çfarë duhet bëj? Duhet të pezulloj veprimtarinë e qeverisë për një muaj? Më vjen keq, por unë ketë s’mund ta bëj sepse thjesht po bëj punën time si kreu i shtetit.

Sigurisht që dy strukturat janë të ndërlidhura me njëra-tjetrën dhe do të jene operative prej datës 1 gusht dhe flitet aktualisht për më tepër se 1 mijë vende dhe pastaj për të mbërritur deri tek shifra 3 mijë siç kemi folur dhe siç kemi rënë dakord.

Ju faleminderit të gjithëve!